ಚಳಿಗಾಲದ ತೀವ್ರತೆ -
ನಡುವಯಸ್ಸಿನ ನಾರಿ ನಸುಕಿನ ವಿಹಾರಕ್ಕೆ ಗೈರು;
ಗಂಡನ ಅಚ್ಚರಿ ಪ್ರಣಯ ಸೂಚನೆಗೆ ಖುಷಿಯಾಗಿ.
ಚಳಿಗಾಲದ ತೀವ್ರತೆ –
ಪತಿಯ ಅನಿರೀಕ್ಷಿತ ಹೊಗಳುವಿಕೆಗೆ ಕರಗಿದಂತೆ ನಟಿಸಿದ;
ಸಧಾರಣ ಸತಿ.
ಚಳಿಗಾಲದ ತೀವ್ರತೆ –
ಕಂಜೂಸು ಗೆಳೆಯ ಹಠಾತ್ತನೆ ಉದಾರ ಹೃದಯವಂತನಾದದ್ದು ಕಂಡು;
ಗುಮಾನಿಯಿಂದ ನಸುನಕ್ಕಳು.
ಚಳಿಗಾಲದ ತೀವ್ರತೆ –
ಶಾಲು, ಸ್ವೆಟರ್, ಕಡೆಗೆ ಕಂಬಳಿ ಕೂಡ ಪರಿಪರಿಯಾಗಿ ಬೇಡಿದ್ದು;
ಮುನಿದ ಮಡದಿಯ ಸನಿಹ.
ಚಳಿಗಾಲದ ತೀವ್ರತೆ –
ಕಂಡರಾಗದ ದಂಪತಿ ಜೊತೆಯಾಗಿ ಸಮ್ಮತಿಸಿದರು
ಮುಂದೂಡಲು;
ತಮ್ಮ ವಿವಾಹ ವಿಚ್ಛೇದನ.
ಚಳಿಗಾಲದ ತೀವ್ರತೆ –
ಹದಿ ಹರೆಯದ ಹೆಂಗೆಳೆಯರ ಹೊಸ ಹುರುಪಿನ ವರಸೆಗೆ;
ಯುವಕರು ಕುಸಿದು ಕಂಗಾಲು.
