ಬಿಂಬ – 88

ಪ್ರಾಯದಾಗ ಮೊಡವೆ,

ಮತ್ತೆ 

ಮುಗಿಯುವಾಗ ಒಡವೆ.

ಬಿಂಬ – 87

ನನ್ನ ಗೆಳತಿ

ಅವಳ ಸವತಿ –

ಸಾಹಿತ್ಯ

ಬಿಂಬ – 86

ಬಾಳಿಗುಂಟ ಬೆಳಗು –

ಅವಳ ಕಿರುನಗು

ಬಿಂಬ – 85

ಮೊಗೆದಷ್ಟೂ ಮುಗಿಯದ

ಸಂಪತ್ತು ಮತ್ತು ನನ್ನ ದುರಾಸೆ –

ಸಾಹಿತ್ಯ

ಬಿಂಬ – 84

ನಿರಂತರ ನಶೆ –

ಕವಿತೆ

ಬಿಂಬ - 83

ಬದುಕಿಗಿಷ್ಟು ಬಣ್ಣವಿಡಲು ಬಯಲ ದಾರಿಗುಂಟ 

ಬಿಂಬ – 82

ಕಾವ್ಯದ ನಶೆ ನಿರಂತರ

ಬಿಂಬ - 81

ಸಾಹಿತ್ಯ ಸಾಧಕನ, ಸಾಮಾನ್ಯನ ಸಾಮರ್ಥ್ಯಕ್ಕೆ ಸಾಧನ ಮತ್ತು ಸವಾಲು. 

ಬಿಂಬ: 76 – 80

ಬಿಂಬ - 76

ಹೊಂಗೆ ನೆರಳಲಿ ನಲಿವ ನಕ್ಷತ್ರ ನುಸುಳಿದ ಕಿರಣ

ಬಿಂಬ - 77

ಮೌನ ಮೀಟಿದಷ್ಟು ಮಾತು ಮಥಿಸಲಾರದು

ಬಿಂಬ - 78

ಬೊಜ್ಜಿಗಿಂತ ಬೆಟ್ಟ ಕರಗಿಸುವುದೇ ಸಲೀಸು

ಬಿಂಬ - 79

ಅವಳ ಮಾತು ಮುತ್ತು, ಮೌನ ಮತ್ತು

ಬಿಂಬ - 80

ಕವಿಗೆ ಕಲ್ಪವೃಕ್ಷ ಮದ್ಯ, ಇಲ್ಲವೇ ಪದ್ಯ

ಬಿಂಬ: 71 - 75

ಬಿಂಬ - 71
ಮಾರಕವನ್ನು ಪೂರಕವೆಂದು ಬಿಂಬಿಸುವ ಕಲೆ ರಾಜಕೀಯ.

ಬಿಂಬ – 72
ಬಡವರ ಹಸಿವಿಗೆ ಬಲ್ಲಿದ ಬಲಿಯಾಗುವ ದಿನ ಮುಂದೆ ಬರಬಹುದು.

ಬಿಂಬ - 73
ಪರಿಮಳ ಹೊಮ್ಮಿಸಿ ಸೆಳೆವ ಹೂವೆ, ಹಾದರವೆಂದಾರು ಜೋಕೆ?

ಬಿಂಬ - 74
ಪೊರೆ ಕಳಚಿ ಕೊಳೆ ಕಳೆವ ಹಾವೇ, ವಿಷವ ತೊರೆಯಲು ಸಾಧ್ಯವೆ?

ಬಿಂಬ - 75
ಬೆಲ್ಲಕ್ಕೆ ಮುತ್ತುವ ಇರುವೆ, ಹೆಣಕ್ಕೂ ದಾಂಗುಡಿ ಇಡಲು ಹೇಸುವುದಿಲ್ಲ.

ಬಿಂಬ : 66 - 70

ಬಿಂಬ - 66
ಆ ಕಾಡ್ಗಿಚ್ಚಿಗೆ ಕರಗಿ ಹೋಗಿದ್ದು ಕೇವಲ ಕಾಡಲ್ಲ..?

ಬಿಂಬ – 67
ಅವಳು ಕಾರ್ಮೋಡ, ಅವನು ಕಗ್ಗಾಡು
ಅವರ ಕಾಳಗಕ್ಕೆ ಗುಡುಗು, ಮಿಂಚು, ಮಳೆ.

ಬಿಂಬ - 68
ಪಕ್ವವಾದ ಹಣ್ಣು ಬಯಸೀತಾದರೂ ಏನನ್ನು..?

ಬಿಂಬ - 69
ಬಾಟಮ್ ಜೀನ್ಸ್ ತುಂಬಿಕೊಂಡ ಪೋರಿ,
ಪಡ್ಡೆ ಹೋರಿಗಳೆಲ್ಲಾ ಚೆಲ್ಲಾಪಿಲ್ಲಿ...

ಬಿಂಬ - 70
ಮೋಹಕ ಕಂಗಳ ಮಾದಕ ನಗೆಯ ಪ್ರವಾಹಕ್ಕೆ
ಸಿಲುಕದ ಮಹನೀಯರು ಇದ್ದರೆ, ಅದು ಖಂಡಿತ ಸುಳ್ಳು.

ಬಿಂಬ 61 - 65

ಬಿಂಬ - 61
ಅಮೂರ್ತ ಬಿಂದುಗಳ ಬಂಧನ ಬದುಕು

ಬಿಂಬ - 62
ಬಾನ ಕನಸಿಗೆ, ಬಯಲೆ ಬದುಕು

ಬಿಂಬ – 63
ಕಾಂಕ್ರೀಟ್ ಕಾಡಲ್ಲೂ ಜೇನುಗೂಡು,
ಕೋಗಿಲೆ ಹಾಡು...

ಬಿಂಬ - 64
ಮಡಿಕೆಯೊಳಗೂ ಚಿಮ್ಮುವ ಹೊಂಗಿರಣ

ಬಿಂಬ - 65
ನಾನು ಬಯಲು, ಬಾನು ಅವಳು

ಬಿಂಬ : 56 – 60

ಬಿಂಬ - 56
ಸಾಗರ ದಿಕ್ಕರಿಸಿ
ನಿತ್ಯ ಹರಿವ ನದಿ
ನಾಗರೀಕತೆ

ಬಿಂಬ - 57
ಬಿಡಿಸಲಾಗದ ಕಗ್ಗಂಟು
ಬಿಚ್ಚಿಟ್ಟ ನಂತರ ಬಾಳೆ ಸಿಪ್ಪೆ

ಬಿಂಬ - 58
ಕಣ್ ರೆಪ್ಪೆಗಳಲ್ಲಿ ಕಳೆದುಕೊಂಡದ್ದು
ಮೊಗೆದಷ್ಟೂ ಎಟುಕದ ವಿವರಗಳು

ಬಿಂಬ - 59
ಸುಡುಸುಡು ಬಿಸಿಲಿಗೆ ದಾಹ
ಬತ್ತಿದ ಬಾವಿಗೆ ಬೀಗ

ಬಿಂಬ - 60
ಕಾವ ಕರಗಿಸಿದ ಕಡಲು
ಸುನಾಮಿ ಅದರ ಸಿಡಿಲು

ಬಿಂಬ : 51 - 55

ಬಿಂಬ - 51
ಜಗವೆಲ್ಲಾ ಮಾಯೆ
ನನ್ನವಳು ಅದರ ಛಾಯೆ...

ಬಿಂಬ - 52
ಅವಳ ತವಕ ತಲ್ಲಣಗಳೂ
ಸಹ ಪ್ರೀತಿಯ ಬಾಣಗಳು...

ಬಿಂಬ - 53
ಮದಿರೆಯೆ ದಾಹ
ನಿಯಂತ್ರಿಸುವುದು, ಅವಳ ಕಾಡುವ ಮೋಹ...

ಬಿಂಬ – 54
ಅವಳ ಮೌನ ರಾಗಗಳಗೆ,
ಹಾರುವ ಹಕ್ಕಿ ಉತ್ತರ ನೀಡಿದೆ...

ಬಿಂಬ – 55
ಅವಳ ನಗುವಲ್ಲೂ ನೋವನ್ನು
ಬಿಂಬಿಸುವ ಪರಿ, ಕಳವಳ ಮೂಡಿಸುತ್ತದೆ...

ಬಿಂಬ : 46 – 50

ಬಿಂಬ – 46
ಕಲ್ಲು ಬೀಸಿದ್ದು ಕಾಯಿಗೆ
ಬಿದ್ದದ್ದು ಹಣ್ಣು
ನಂತರ ಪಾಪ ಪಶ್ಚಾತ್ತಾಪ...

ಬಿಂಬ – 47
ಎಲ್ಲರನ್ನೂ ನಿರಂತರ
ಕಾಡುವುದು ಯಾವುದಾದರೂ
ಒಂದು ಹಸಿವು...

ಬಿಂಬ – 48
ನಲ್ಲೆ
ಚಳಿಗಾಲದಲ್ಲಿ
ಎಲ್ಲದಕ್ಕೂ ಮಿಗಿಲು
ನಿನ್ನ ಆಲಿಂಗನ

ಬಿಂಬ – 49
ಒಮ್ಮೆಗೆ,
ಸ್ವರ್ಗವನ್ನೂ ಸಹ ಮರೆಯಬಹುದು,
ಕಾವ್ಯ, ಮದ್ಯ, ಇಲ್ಲಾ ಮಹಿಳೆ
ಸದಾ ಇವರ ನಶೆಯಲ್ಲಿರುವವರು.
ಮತ್ತೆ ಇವರನ್ನು ಕಂಡಾಗ
ಬಹಳ ಸಭ್ಯರೂ ಕೂಡ ತೀವ್ರ ಅಸೂಯೆಯಿಂದ,
ತಮ್ಮ ಅಸಹಾಯಕತೆಗೆ ಮರುಗುತ್ತಾರೆ.

ಬಿಂಬ – 50
ಕ್ಷಮಿಸಿ...
ಕಾಫಿ, ಸಿಗರೇಟ್, ಗರ್ಭನಿರೋಧಕಗಳು
ಮತ್ತೆ ಎಲ್ಲಕ್ಕಿಂತಲೂ ಮುಖ್ಯವಾಗಿ ಮದ್ಯಸಾರ!
ಪ್ರತಿ ಚಳಿಗಾಲದಲ್ಲಿ ತಮ್ಮ ನಿರಂಕುಶ ಅಧಿಕಾರ ಚಲಾಯಿಸುತ್ತವೆ.

ಬಿಂಬ : 41 - 45

ಬಿಂಬ - 41
ಕಾವ್ಯವನ್ನರಿಯುವ ಸಂಯಮ ಸಿದ್ಧಿಸಿಕೊಂಡರೆ,
ಬದುಕು ಸವಿಯುವ ಸಾಮರ್ಥ್ಯ ಸಾಧಿಸಿದಂತೆ.

ಬಿಂಬ – 42
ತೀವ್ರ ನಿರಾಸೆಗಳಿಂದ ಪಾರಾಗಬೇಕಾದರೆ,
ಮೊದಲು ನಿರೀಕ್ಷೆಗಳನ್ನು ನಿಯಂತ್ರಿಸಬೇಕು.

ಬಿಂಬ - 43
ನಾವೇ ಹೆಣೆದ ಜೇಡರ ಬಲೆಯಲ್ಲಿ ಸೆರೆಯಾಗಿ
ಹೊರಬರಲಾಗದೆ ಒದ್ದಾಡುವುದು ವಿಪರ್ಯಾಸ.

ಬಿಂಬ – 44
ಜಗತ್ತಿನ ಅತಿ ಶ್ರೇಷ್ಠ ಶ್ರೀಮಂತ,
ನಿತ್ಯ ಸಾಹಿತ್ಯ ಸವಿಯುವ ಸಂತ.

ಬಿಂಬ – 45
ಯಶಸ್ಸನ್ನು ಸವಿಯುವ ಹುಮ್ಮಸ್ಸಿನಂತೆ,
ಸೋಲು ಸ್ವೀಕರಿಸುವ ಸಾಮರ್ಥ್ಯ ಅಗತ್ಯ.

ಬಿಂಬ – 40

ಸುಂದರಿಯೊಬ್ಬಳ
ಸೌಂದರ್ಯ ಸವಿಯುವುದು
ಮಾನವ ಸಹಜವಾದರೂ,
ಅಸಹಜ ರೀತಿಯಲ್ಲಿ
ಆಸ್ವಾಧಿಸುವುದು
ಅಪರಾಧ
ಅಲ್ಲವೆ?

ಬಿಂಬ – 39

ನಾನು ಸಹಜವಾಗಿ
ಸಭ್ಯನಾಗಿರುವುದು
ನಿಮ್ಮ ಪ್ರಾಮಾಣಿಕ
ಹೆಬ್ಬಯಕೆ, ಒತ್ತಾಸೆ
ಎಂಬುದು ನಿಜವಾಗಿದ್ದಲ್ಲಿ
ದಯವಿಟ್ಟು ಕುಡಿತವನ್ನೊಂದು
ಬಲಹೀನತೆಯೆಂಬುದಾಗಿ
ಬಿಂಬಿಸುವುದು ನೀವು
ಕೂಡಲೇ ನಿಲ್ಲಿಸಿ.

ಬಿಂಬ – 38

ನನ್ನನ್ನು
ನಿರ್ಲಿಪ್ತವಾಗಿ,
ಪ್ರಾಮಾಣಿಕವಾಗಿ,
ನಿಸ್ವಾರ್ಥದಿಂದ, ತೀವ್ರವಾಗಿ
ಬಯಸುವ, ಪ್ರೀತಿಸುವ, ಅಪ್ಪಿಕೊಳ್ಳುವ,
ಮುತ್ತಿಟ್ಟು ಮತ್ತೇರಿಸುವ
ಏಕೈಕ ಆಪ್ತ ಸಾಧನ
ಮದ್ಯಪಾನ.

ಬಿಂಬ – 37

ನಮ್ಮ
ಸಮಾಜದಲ್ಲಿ
ಕೆಟ್ಟವರ ಪ್ರಮಾಣ
ಹೆಚ್ಚಾಗಿರುವುದರಿಂದಲೇ
ಸಜ್ಜನರಿಗೆ ಸೂಕ್ತ
ಪ್ರಾಶಸ್ತ್ಯ.