ಹಾಯ್ಕು - 16

ಸೂರ್ಯನ ಸೆರೆಯಿಡಿದೆ
ಎಂದು ಬೊಬ್ಬಿಡುವ ಅವಳ ಅಂಗೈಯಲ್ಲಿ ಸೇವಂತಿ ಕಂಡು
ತುಸು ಬೆಚ್ಚಿದ್ದು ಸುಳ್ಳಲ್ಲ...

ಹಾಯ್ಕು – 15

ಮಾಗಿಯ ಎಲೆಗಳು
ಅಜ್ಜನ ಬಾಲ್ಯದ ಕಥೆಗಳನ್ನು
ಬಹಳ ಆಸ್ಥೆಯಿಂದ ಕೇಳಿಸಿಕೊಳ್ಳುತ್ತವೆ...

ಹಾಯ್ಕು - 14

ಅಂಗೈತುಂಬ ಮಲ್ಲಿಗೆ ಹಿಡಿದು
ಪೂರ್ಣಚಂದ್ರನು ಇವನೆ ಎನ್ನುವ
ಅವಳ ಪ್ರಖರ ಮುಗ್ಧತೆಗೆ ಬೆರಗಾದೆ...

ಹಾಯ್ಕು - 13

ಹೆಜ್ಜೆಯ ಗುರುತುಗಳೆಲ್ಲಾ
ಅಲೆಗಳು ಅಳಿಸಿ ಹಾಕಿದರೂ ಸಹ
ತಪ್ಪುಗಳಿನ್ನೂ ತೀವ್ರವಾಗಿ ಕಾಡುತ್ತಿವೆ ...

ಹಾಯ್ಕು - 12

ನಲ್ಲಿಯಿಂದ ನೀರು ತೊಟ್ಟಿಕ್ಕುತ್ತಿದೆ
ಗಡಿಯಾರದ ಪೆಂಡುಲಮ್ ಲಯದೊಂದಿಗೆ,
ಜಾಗತಿಕ ತಾಪಮಾನದ ಮುನ್ಸೂಚನೆ ನೀಡುತ್ತಾ...

ಹಾಯ್ಕು - 11

ಮಂಜು ಮುಸುಕಿದ ನಸುಕಿನಲ್ಲಿ
ನುಗ್ಗುವ ಬೆಚ್ಚಗಿನ ರವಿಕಿರಣ
ಅವಳ ಕಿರುನಗು ...

ಹಾಯ್ಕು - 10

ಮುಸ್ಸಂಜೆಯ ನಂತರ
ಹೊಳೆವ ತಾರೆಗಳು,
ಅವಳ ಕಣ್ಣುಗಳು...

ಹಾಯ್ಕು – 9

ತುಂತುರು ಮಳೆಯಲ್ಲಿ
ನಶೆಯೇರಿಸುವ ಮಣ್ಣಿನ ಸುಗಂಧ,
ಅವಳ ಬೆವರು.

ಹಾಯ್ಕು – 8

ನಲ್ಲೆ, ನನ್ನ ಯೌವನ
ಮುಳುಗಿ ಹೋಯಿತು ನಿನ್ನಲ್ಲಿ
ಮುಗಿಲೆತ್ತರದ ಕಡಲಲ್ಲಿ ಮುರಿದ ದೋಣಿಯಂತೆ...

ಹಾಯ್ಕು - 7

ಗೆರೆಗಳು –
ಕಟ್ಟಬಹುದು, ಇಲ್ಲಾ ಕಡಿಯಲೂಬಹುದು
ತಮ್ಮ ಭವಿಷ್ಯವನ್ನು...

ಹಾಯ್ಕು - 6

ನೋವು, ನಲಿವುಗಳೊಂದಿದ
ರಾಗಗಳು –
ಆಲಿಸಿದವರು ಅತಿವಿರಳ...

ಹಾಯ್ಕು - 5

ಬೆಲೆಯುಬ್ಬರ –
ಅಬ್ಬರದ ಹೇಳಿಕೆಗಳು ಉರಿಯುತ್ತಿವೆ
ಕಾಡ್ಗಿಚ್ಚಿನಂತೆ...

ಹಾಯ್ಕು - 4

ವಸಂತ –
ಹೊಂಬಿಸಿಲಿಂದ ಸೂರ್ಯ ಕರಗಿಸುತ್ತಾನೆ
ಎಲ್ಲರ ನೋವನ್ನು...

ಹಾಯ್ಕು - 3

ಹಾವು,
ಚುರುಕಾಗಿದೆ ತನ್ನ ಪೊರೆ ಕಳಚಿ.
ಮುಖವಾಡ ಹೊತ್ತವರು ಕಂಡು ಬೆಚ್ಚಿಬಿದ್ದರು...

ಹಾಯ್ಕು - 2

ಮಾಗಿಯಲ್ಲಿ,
ಬೆತ್ತಲಾದ ಮರಗಳು ಸಂಕೋಚ ತೊರೆದು,
ಸಂತಾಪ ಸೂಚಿಸುತ್ತಿವೆ...

ಹಾಯ್ಕು - 1

ಸುದೀರ್ಘ ಮಾಗಿ –
ಮರಗಳು ಎಲೆಗಳನ್ನು ಕಳಚುತ್ತಿವೆ
ಶುಭಯಾತ್ರೆ ಕೋರುತ್ತಾ...