ಪ್ರತಿಬಿಂಬ

ಅಸ್ಪಷ್ಟ ಹಾದಿಯ ಹಕ್ಕಿಗೆ
ಹಲವಾರು ಹಂಬಲದ ತೇರು
ಕಲಹ, ಕದನ, ಕೋಲಾಹಲ
ಉನ್ಮತ್ತ ಚಿತ್ತಕ್ಕೆ ಪಿತ್ತ

ವೇಗ, ಉದ್ವೇಗದ ಸವಾರಿ
ಹಗಲುವೇಶದ ಅನಾಮಧೇಯ
ಹರಹರ ಅರ್ಧನಾರೀಶ್ವರನಿಗೆ
ಸಂಯಮ ಎಂದೋ ಪರಾರಿ

ಮಾತಿಗಿಲ್ಲ ಪುರಸೊತ್ತು
ಮತಿಗೆ ಎಲ್ಲಿಲ್ಲದ ಕಸರತ್ತು
ನುಸುಳುವ ಸ್ಮಶಾನ ಮೌನಕ್ಕೆ
ಧಾರಾವಾಹಿಯ ತಪ್ಪದ ಕಿರಿಕಿರಿ

ಏನೇನೋ ಲೆಕ್ಕಾಚಾರ
ಇಲ್ಲಿ ಎಲ್ಲವೂ ಅಗೋಚರ
ಪಿಸುಮಾತು, ಗುಸುಗುಸು
ಸಂಚಿಗೆ ಮದ್ಯಸಾರದ ನೈವೇದ್ಯ

ಬಡಪಾಯಿ ಶಂಭುವಿಗೇಕೋ
ರಿಂಗಣಿಸುವ ತವಕ, ತಲ್ಲಣ
ಅತಂತ್ರತೆ, ಅಸಹಾಯಕತೆ
ನಿತ್ಯನೂತನದ ಕಾರ್ಯಸಿದ್ಧಿ