ಹಾಡು ಹಕ್ಕಿ

ಹಾಡು ಹಕ್ಕಿಯೆ ಹಾರುತ
ಹಾದಿಯ ಸನಿಹಕೆ ಜಾರದೆ
ನಲಿವ ನವಿಲಿನ ಮಾಯೆಗೆ
ನಯನ ಮನೋಹರವಾಗಿದೆ

ನವ ದಿಂಗತದ ಆಗಮನಕೆ
ರವಿಯು ಆರತಿ ಬೆಳಗುವ
ಮುಸ್ಸಂಜೆ ಪರದೆಯನೆಳೆದು
ಮುತ್ತಿನ ತೋರಣ ಕಟ್ಟುವ

ಚೆಲುವ, ಚತುರನು ಚಂದಿರ
ಚದುರಂಗದಾಟವನಾಡುವ
ಇವನ ಮಾಯಾ ಮೋಡಿಗೆ
ಮರುಳಾಗಿ ಮೈಮನ ಪುಳಕ

ಮೋಡ ಕವಿಯುವ ಮಾತ್ರಕೆ
ಮಂದಹಾಸವು ಮಸುಕಾಯಿತೆ
ಶೃಂಗಾರ ಲಹರಿಯು ಹರಿವ
ಕ್ಷಣದಲಿ ಮೂಕವಿಸ್ಮಿತರಲ್ಲವೆ

ಬಾನಿನಂಚಿನ ಬೆಳ್ಳಿ ಬೆಳಗು
ಯಾವ ರಾಗದ ಆರೋಹಣ
ಯಾವ ತಾಳದ ದಿಂ ದಿಂನ
ತಾರೆಗಳ ತೇರಿನ ರಿಂಗಣ

ಯಾವ ಚುಕ್ಕಿಯ ಸೆಳೆತಕೆ
ಹಾರುವ ಹಕ್ಕಿಯು ಮಿಡಿದಿದೆ
ಗಮ್ಯವ ಸೇರುವ ತುಡಿತಕೆ
ಸಕಲವ ತೊರೆದು ನಿಂತಿದೆ