ರಕ್ತಪಾತ

ಹರಿಯುತಿದೆ ಬಿಸಿರಕ್ತ
ಅಳುವ ಕಂದನಕೆಳಗೆ ನುಸುಳಿ
ಅಂಗೈಯಲ್ಲಾ ಕೆಂಪು ಕೆಂಪು
ಕಂದನ ಕಣ್ಣಲ್ಲಿ ಆತಂಕ

ಅಮ್ಮ, ಅಪ್ಪನ ಸಾಂತ್ವನದ ಸಿಹಿಮಾತು ಮಾಯ,
ಎಂದಿನಂತೆ ಅತ್ತು ಕರೆದರು ಸಿಗದೇ ಉತ್ತರ,
ಇಂದೇಕೋ ಒಂದು ನಡೆಯುತ್ತಿಲ್ಲ
ಅಂದುಕೊಂಡಂತೆ, ಎಲ್ಲ ಯತ್ನವೂ ವ್ಯರ್ಥ

ನೀರಿನಲ್ಲಿ ನಲಿದಾಡುವ ಕಾತುರ
ಇಂದು ಕಂದನ ಸೆಳೆಯುವಲ್ಲಿ ಸೋತಿದೆ
ಭಯ ಮಿಶ್ರಿತ ದ್ವಂದ್ವ, ಮುಗ್ಧ ಮುಖಭಾವ
ಎಲ್ಲವೂ ಸ್ತಬ್ಧ, ತೊಟ್ಟಿಕ್ಕುವ ರಕ್ತ ನಾದ

ಮಗು ಒಂದೇ ಸಮ ಜೋರು ಅಳು
ಆದರೂ ಅಮ್ಮನಿಗೇಕೋ ಗಾಢನಿದ್ರೆ
ಅಪ್ಪನ ನೋಟ ಅದರತ್ತಲೇ ನೆಟ್ಟಿ,
ಅಪರಿಚಿತರಂತೆ ಭಾಸವಾಗುತ್ತಿದೆ

ಕೆಂಪು ಕಪ್ಪಾಗುವಂತೆಲ್ಲಾ,
ಮಗುವಿನ ಆಕ್ರಂದನ ಕ್ರಮೇಣ ಕ್ಷೀಣಿಸಿ,
ಧಣಿದ ದೇಹ ನಿದ್ರೆಗೆ ಜಾರುತಿದೆ
ಮಂಪರುಗಣ್ಣಲ್ಲಿ ನಿರೀಕ್ಷೆ ಇನ್ನೂ ಜೀವಂತ