ಕಲ್ಲುಹೃದಯ

ಹಾರಿಹೋಯಿತು ಜೀವ ಗೆಳೆಯ
ನೂರು ಕನಸನು ಕೊಚ್ಚಿಕಡಿದು
ನಿಲ್ಲದಾಯಿತೊ ರಕ್ತದೋಕುಳಿ
ಕುಣಿಯುತಿದೆಯೊ ಕಲ್ಲುಹೃದಯ

ತೊಟ್ಟತೊಡುಗೆ ಹರಿದುಹೋಗಿದೆ
ಮುಖವಾಡ ನೋಡು ಜಾರಿಬಿದ್ದಿದೆ
ಇರುವ ಪರದೆಗಳೆಲ್ಲ ಕಳಚಲು
ನಗ್ನ ದರ್ಶನ ಪಡೆದು ಪಾವನ

ಅದೇ ರಾಗ, ಅದೇ ವೇಗ,
ಅದೇ ಯಾಂತ್ರಿಕ ಸ್ಪಂದನೆ
ಹೃದಯಹೀನ ಈ ರಾಜಕಾರಣ
ಮುಕ್ತಿ ಕೊಡುವೆಯಾ ಆಪ್ತನೆ

ಸನ್ನಿವೇಶಕೆ ತಕ್ಕ ವೇಶ
ಮುಖದಲಿರಲು ಕೃತಕ ಆವೇಶ
ಇದು ಯಾವ ಸ್ತರದ ಆತ್ಮವಂಚನೆ
ಇಲ್ಲವಾಯಿತೇ ವಿವೇಚನೆ

ಲಾಭ ಪಡೆವ ಏಕೈಕ ತವಕ
ನಡೆ ನುಡಿಗಳದಕೆ ಪೂರಕ
ಉರಿವ ಬೆಂಕಿಗೆ ತೈಲವೆರೆದು
ಗಹಗಹಿಸಿ ನಗುತಿಹ ಕೀಚಕ

ಇದು ಯಾವ ಪರಿಯ ನಾಟಕ
ಘೋರ ಹೃದಯವಿದ್ರಾವಕ
ಪ್ರತಿಭೆಯ ಪ್ರದರ್ಶನ ತಾರಕ
ಧನ್ಯನಾದೆನೊ ನಾಯಕ

ಒಂದು, ಎರಡು, ಮೂರು ದಿನ
ಸಾಕು ಮರೆಯುವೆ ಮರುದಿನ
ಅಡಗಿ ಕುಳಿತಿಹ ಇಲಿಗಳೆಲ್ಲ
ಹೊರಗೆ ಬರಲದೆ ಶುಭದಿನ

ಮುಗ್ಧ ಜನರ ಮರಣಹೋಮ
ಸಾವು ಬದುಕು ಜನರ ಕರ್ಮ
ನಿತ್ಯ ನರಕ, ನಿತ್ಯ ಚರಕ
ನಿತ್ಯ ಹಸಿವಿಗೆ ಬೇಕು ಕಾಯಕ