Feb 12, 2009

ಮತ್ತೆ ಬರುವನು ಚಂದಿರ - 15

ಹಣ್ಣೆಲೆಗಳು ಉದುರಿದಾಗ
ಹೊಸ ಚಿಗುರು ಮೂಡಿದಾಗ
ಚಿರಯೌವನ ಮೈದುಂಬಿತು
ಹೂವರಳಿದಾಗ ಚಂದಿರ

ಕಳೆದಾಯಿತು ಭೂತಕಾಲ
ಉಗಮಿಸಲಿದೆ ಭವಿಷ್ಯಕಾಲ
ಇರುವ ವರ್ತಮಾನ ಜಾರಲು
ಬಿಡಬೇಡವೊ ಚಂದಿರ

ಮತ್ತೆ ಮತ್ತೆ ಹೊಸತು ಜನುಮ
ಯಾವುದಿಲ್ಲ ಜಗಕೆ ಪರಮ
ಆದಿ ಅಂತ್ಯವೊಂದೆ ನಿಯಮ
ಒಲವೆ ಬದುಕು ಚಂದಿರ

ಸಿಹಿಯಾದುದ ಹಂಚಿಬಿಡು
ಕಹಿಯಾದುದ ನುಂಗಿಬಿಡು
ಸಿಹಿ ಕಹಿ ಈ ಬಾಳ ಸಹಿ
ಸರಿಯಬೇಡ ಚಂದಿರ

ಅಂತರಾಳದೊಳಗಿನಿಂದ
ಎದ್ದು ಬಂದ ಉಗ್ರವ್ಯಾಘ್ರ
ಹೊರೆಯಾಗಿ, ವಿಧಿಯಾಗಿ
ಕಾಡುತಿಹುದೊ ಚಂದಿರ

ಕಹಿಯಿರದ ಸಹನೆಯಿರಲು ಸಿರಿವಂತ
ಮೈದುಂಬಲು ಬಯಸಿದಾಗ ವಸಂತ
ಹಸಿರಿರಲು ಉಸಿರಿಗವನೆ ಭಗವಂತ
ಎಲ್ಲದಕು ಜೊತೆಗಿರುವವನೆ ಚಂದಿರ

No comments: