Jan 7, 2009

ಭಾರತಿಯೆ

ಶಿರಬಾಗಿ ವಂದಿಸುವೆ ತಾಯಿ ಭಾರತಿಯೆ
ನೀ ಸರ್ವಧರ್ಮವ ಸಲಹೊ ಕರುಣಾಮಯಿ
ಸಕಲ ವರ್ಣಗಳ ರೂಪ ನೀ ಶ್ವೇತಾಂಬರಿ
ಮನುಕುಲಕೆ ಮಾದರಿ ನಿನ್ನೊಲವು ತಾಯೆ

ಶಿರಬಾಗಿ ವಂದಿಸುವೆ ತಾಯಿ ಭಾರತಿಯೆ
ಸಿಹಿನೀರನರಿಸುವೆ ನೀ ನಡೆವ ನೆಲದಲ್ಲಿ
ಫಲಪುಷ್ಪಗಳ ತೇರು ಆ ನಿನ್ನ ಮುಡಿಯಲ್ಲಿ
ಶಾಂತಿ, ಸಂತಸವ ಸಿದ್ಧಿಸುವ ಮಾಯೆ

ಶಿರಬಾಗಿ ವಂದಿಸುವೆ ತಾಯಿ ಭಾರತಿಯೆ
ಮಲಯ ಮಾರುತದಿ ತಂಪುಗೊಂಡವಳೆ
ವನ, ಕಾನನಗಳಿಂದ ಇಂಪುಗೊಂಡವಳೆ
ಚರಣ ಸ್ಪರ್ಶಕೆ ಸ್ಪರ್ಗ ತಾಯಿ ಭಾರತಿಯೆ

ಶಿರಬಾಗಿ ವಂದಿಸುವೆ ತಾಯಿ ಭಾರತಿಯೆ
ಬೆಳ್ಳಿ ಬೆಳದಿಂಗಳಿಗೆ ನೀ ಪುಲಕಗೊಂಡಿರುವೆ
ಹೊಳೆವ ಕಣ್ಣುಗಳಿಂದ ನೀನಿರುಳ ಬೆಳಗುವೆ
ನಿನ್ನ ನಗುವಿಂದಲೇ ನಮ್ಮ ಮನಗೆಲ್ಲುವೆ

ಶಿರಬಾಗಿ ವಂದಿಸುವೆ ತಾಯಿ ಭಾರತಿಯೆ
ಸರ್ವಮತಗಳ ಊರು ನಿನ್ನ ತವರೂರು
ಸಹನೆ, ಸಂಯಮಗಳಿಗೆ ನೀನೆ ಕಲ್ಪತರು
ಸರ್ವರಿಗೂ ಸದ್ಗತಿಯ ಸನ್ಮಾರ್ಗ ತೋರು

No comments: