ನಗರೀಕರಣದ ಲಗ್ಗೆ

ನೋಡಾ ನಗರೀಕರಣದ ಲಗ್ಗೆ
ಸೆಳೆಯುತಿದೆ ಎಲ್ಲರ ಜಗ್ಗಿ ಜಗ್ಗಿ
ಆಗಸದೆತ್ತರ ಏರಿದೆ ನೆಲದ ಬೆಲೆ
ಕಂಗಾಲಾಗಿಹರು ಜನ ಸಿಗದು ನೆಲೆ

ಶಬ್ದ ಮಾಲಿನ್ಯ, ವಾಯು ಮಾಲಿನ್ಯ,
ಜಲ ಮಾಲಿನ್ಯ, ಜನ ಮಾಲಿನ್ಯ
ಭೂಗಳ್ಳರ ಹಾವಳಿ, ಭೂಗತರ ಧಾಳಿ
ಎಲ್ಲವೂ ಅಸ್ಥವ್ಯಸ್ಥ, ಎಲ್ಲರೂ ತಟಸ್ಥ

ಜಗ್ಗಿ ನಡೆಯುತಿದೆ ಕಾರುಬಾರು
ಇದ್ದವರದ್ದೇ ಇಲ್ಲಿ ದರಬಾರು
ಸಾಮಾನ್ಯ ಜನತೆಯ ಕನಸುಗಳ
ಕೊಂದು ಮುಕ್ಕುವರು ರಸಗವಳ

ನಿಲ್ಲದೆ ಸಾಗಿದೆ ನಿತ್ಯ ಹರಣ
ಹಬ್ಬಿದೆ ಎಲ್ಲೆಡೆ ಅಸಮತೋಲನ
ಕುಣಿದಾಡುತಿದೆ ಪಾಪದ ಹಣ
ಕುರುಡಾಗಿಹರು ಇಲ್ಲಿ ಬಹಳ ಜನ