ಕ್ಷಣಮಾತ್ರಕೆ

ಮೂರು ಆರಾಗಲಿ, ಆರು ನೂರಾಗಲಿ
ಕಾಣದ ಗೋಡೆಗಳಲವು ಎದುರಾಗಲಿ
ಇರುವ ಗೂಡಿನಿಂದೆತ್ತಿ ಹೊರಹಾಕಲಿ
ಇರದ ಇರುವೇ ನಮಗೆ ವರವಾಗಲಿ

ಕೊಡುವ ಕಿರುಕುಳಗಳು ಕ್ಷಣಮಾತ್ರಕೆ
ಶಕ್ತಿ, ಸಾಹಸವ ಬಳಸಿ ನೆಪ ಮಾತ್ರಕೆ
ದೂರುತಲೇ ದೂಡುವವನಿವ ದಿನವನು
ಪರರ ಪರಿಮಿತಿಗಳಲಿವ ಸಂತಸವನು

ಜಾರು ಬಂಡೆಯಮೇಲೆ ನಡೆದಾಡುವನು
ಬತ್ತಿದ ಬಾವಿಯಲಿವ ಈಜಲೆತ್ನಿಸುವನು
ತಾನೆ ಹೆಣೆದ ಬಲೆಯಲ್ಲೇ ಬಳಲುವವನು
ಭಾರವನೊತ್ತು ತಿರುಗುವಾ ಪಾಪದವನು

ಸರಳ ತಿರುಳುಗಳನಿವ ತೆಗೆದೊಗೆವನು
ಮಾಸಿದ ಮರ್ಮಗಳ ಮರವಾಗಿಸಿಹನು
ತಿಳಿಗೇಡಿ ತಿರುಕನಿವ ತಿಳಿದಂತಾಡುವ
ತಿರುಗಿ ಮರುಗುವವನು ತಿಳಿಯಲೆತ್ನಿಸದೆ

ಪದದ ಪದಕವ ಪಡೆದ ಪದವೀಧರ
ಸಕಲ ಸಲಕರಣೆಗಳಿದ್ದರೇ ಸುಖಕರ
ಕೃತಕ ಕೊರತೆಗಳನೊತ್ತ ಸರದಾರ
ಎಲ್ಲೆ ಮೀರಿದ ಆಸೆಗಳಿಗಿಲ್ಲ ಉತ್ತರ

ಹಗಲಿರುಳಿನಂದವನುಂಡವನೆ ಜಾಣ
ಪಡೆದಿರುವ ಗೊಂದಲಗಳಾಗ ಗೌಣ
ತಂಗಾಳಿ ಸವಿಯುವಾ ಮನಕೆ ಔತಣ
ಅನುಭವಿಸು ಬದುಕು ನೀ ಪ್ರತೀ ಕ್ಷಣ