ಕೂಡಲ ಸಂಗಮ ದೇವ

ಇದ್ದವರು ದೇಶ ವಿದೇಶಗಳ ಸುತ್ತುವರು
ಸುಂದರ ಪ್ರವಾಸಿ ತಾಣಗಳ ಮುತ್ತುವರು
ವಿಶ್ವ ಪ್ರಸಿದ್ಧ ಅದ್ಭುತಗಳ ಕಂಡು ಬರುವರು
ನಾನೇನು ಮಾಡಲಿ ಕೂಡಲ ಸಂಗಮ ದೇವ

ಐಶಾರಾಮಿ ಕಾರುಗಳೇ ಬೇಕು ಸುತ್ತಿ ಬರಲು
ರುಚಿಗೆ ಬಗೆ ಬಗೆ ತಿಂಡಿಗಳು ಸಾಕು ಮುಕ್ಕಲು
ಬೇಡವೆಂದರೂ ಬರುವ ಬೊಜ್ಜಿಗೆ ಕುಗ್ಗುವರು
ನಾನೇನು ಮಾಡಲಿ ಕೂಡಲ ಸಂಗಮ ದೇವ

ಎಲ್ಲಾ ಮಾದರಿಯ ವಸ್ತುಗಳ ಖರೀದಿಸುವರು
ವಸ್ತ್ರ ವಿನ್ಯಾಸಗಳ ಮೋಡಿಗೆ ಲಗ್ಗೆಯಿಡುವರು
ಕೊಳ್ಳುಬಾಕುತನ ಧಾಳಿಗೆ ಕಳೆದು ಹೋಗುವರು
ನಾನೇನು ಮಾಡಲಿ ಕೂಡಲ ಸಂಗಮ ದೇವ

ಎಲ್ಲೆಲ್ಲೋ ಹುಡುಕುವರು ಗುಡಿ ಗೋಪುರಗಳ,
ಭವ್ಯ ಅರಮನೆಗಳ, ವಾಣಿಜ್ಯ ಮಳಿಗೆಗಳ,
ಕಟ್ಟಿಸುವರು ಮಸೀದಿ, ಮಂದಿರಗಳು ಬಹಳ
ನಾನೇನು ಮಾಡಲಿ ಕೂಡಲ ಸಂಗಮ ದೇವ

ಒಮ್ಮೆ ಬಳಿ ಬಾರಯ್ಯ ನನ್ನಸ್ಥಿತಿ ನೋಡಯ್ಯ
ಪ್ರತಿದಿನವು ಹೊಲ ಗದ್ದೆಗಳಲಿ ದುಡಿವೆನಯ್ಯ
ಬರುವ ಹಣವೆಲ್ಲ ಸಂಜೆಗೆ ಮುಗಿಸುವವನಯ್ಯ
ನಾನೇನು ಮಾಡಲಿ ಕೂಡಲ ಸಂಗಮ ದೇವ

ದುಡಿಮೆಯ ಫಲವಷ್ಟೇ ದೂರುವವನು ನಾನಲ್ಲ
ಕೂಡಿಟ್ಟು ಕಳೆಯಲೆಂದೂ ನಾನು ಕೂಡಿಡಲಿಲ್ಲ
ಆಸೆಗಳ ಬಿಗಿದಿಟ್ಟು, ಕನಸುಗಳ ನಾ ಕೊಲೆಗೈದು
ಹುಸಿ ನುಡಿಯ ಮೆಚ್ಚನೇ ಕೂಡಲ ಸಂಗಮ ದೇವ