ಮುದ್ದು ಗಿಣಿಯೆ

ಮುನಿಸೇಕೆ ಮುದ್ದು ಗಿಣಿಯೆ
ಕರಗೆನ್ನ ಮುತ್ತಿನ ಮಣಿಯೆ
ಮನವನೇಕೆ ತೂರಿ ಬಿಡುವೆ
ಮತ್ತದರ ಹಿಂದೆ ಓಡುತಿರುವೆ

ಅದರ ಜೊತೆಗೆ ಕದನ ತರವೆ
ಈಸ್ಪರ್ಧೆಯಲಿ ಗೆಲುವ ಛಲವೆ
ನಗುವಿನಿಂದ ಸಿಂಗರಿಸಿ ಚೆಲುವೆ
ದಣಿದ ಮನವ ಮುಚ್ಚಿಬಿಡುವೆ

ಅಂಕು ಡೊಂಕು ಮೈಗೆ ಮೆರಗು
ಸಖಿಯ ಸಿಡುಕಿಗಂದ ಸೆರಗು
ನವಿರಾದ ನವಿಲಗರಿಯೆ ಚಂದ
ಈ ಸಿರಿಯನರಿಸಿ ಬಿಗಿದೆ ಬಂಧ

ದಿನಕೆ ನೂರು ಬಗೆಯ ಒಲವು
ಕ್ಷಣಕೆ ಸುಗಂಧ ಭರಿತ ಜಗವು
ಕಾಲ ಕ್ರಿಯಾಶೀಲ ಕವಿಯಂತೆ
ಇವಳವನು ಬರೆದ ಕವಿತೆಯಂತೆ