ಏಕೋ ಎನೋ

ಏಕೋ ಎನೋ ಈ ಏಕಾಂತ ಹಬ್ಬಿ
ಸುತ್ತಲಿರುವ ಸನ್ನಿವೇಶ ಸಪ್ಪೆಯಾಗಿ
ಮೌನವೇ ಮಾತಾಗಿದೆ ಇಂದೇಕೋ
ಕೋಪಕೆ ಕಾರಣವೇನೆಂದು ತಿಳಿಸದೆ

ಮುನಿಸು ಮೂರು ನಿಮಿಷಕೆ ಮರೆತಿಹೆ
ನಮ್ಮಿಬ್ಬರ ಒಪ್ಪಂದ ಮೊದಲಿನಿಂದ
ಇಲ್ಲಿರುವುದೆಲ್ಲ ಇಹವು ಬಯಸಿದಂತೆ
ನೀನು, ಏಕಾಂತದಿ ಏಕಾಂಗಿ ನಾನು

ಪರಿಚಯದ ದಿನದಿಂದಲೇ ಪರಿಚಿತರ
ಜೊತೆಗಿರುವುದು ನನಗೆ ಬಹಳ ವಿರಳ
ಪರಿಸ್ಥಿತಿ ಅರಿವಾಯಿತಾದರೂ ವಿಷಯ
ಹೊರಗೆ ತೋರುವಂತೆ ಇರಲಿಲ್ಲ ಸರಳ

ಉತ್ಸಾಹದ ಕೊರತೆ ಕಾಡುತಿರಲೆನ್ನ
ಚೈತನ್ಯವೆಲ್ಲವೂ ಹಿಡಿದಿಟ್ಟು ನಿನ್ನಲ್ಲಿಯೆ
ಸೋಲು ಗೆಲುವಿನ ಪ್ರಶ್ನೆ ಇದಲ್ಲ ಗೆಳತಿ
ಮುಂದೆ ಜೊತೆಗೇ ಸಾಗುವ ಯತ್ನ

ಎಲ್ಲ ಇದ್ದರೂ ನನಗೆ ಏನೂ ಇರದಂತೆ
ನೀನಿದ್ದರೆ ಸಾಕೆನಗೆ ಎಲ್ಲವೂ ಇದ್ದಂತೆ
ಏಕಾಂತದಲಿ ಕಾಂತ ಕಾದು ಕುಳಿತಿರೆ
ಬಿಡು ಬಿಂಕ ಬೆಡಗಿ ಬೆಳಗಾಗುವ ಮುನ್ನ

ಬಿಗುಮಾನ ನಮ್ಮೊಳಗೆ ನಮಗೇಕೆ
ಅವತರಿಪ ಅನುಮಾನ ಹೊರಗಿಟ್ಟು
ಒಲವೆಂಬ ಹಣತೆಯ ಬೆಳಗು ನೀನು
ಜಗವೆಂಬುದನು ಮರೆತು ಬರುವೆನು