May 13, 2008

ನಮಗೆಲ್ಲಿ ನೆಲೆ

ಬರಿ ಬಿಸಿಲಲ್ಲವೋ ಅಣ್ಣ ಇದು ಉರಿವ ಬೆಂಕಿ
ಉಳಿಗಾಲವೆಲ್ಲಿ ಬರಗಾಲವೇ ಮತ್ತೆ ಹುಡುಕಿ
ಉಸಿರುಗಟ್ಟಿರಲು ಉಸಿರಾಡಲಿಲ್ಲ ಶುದ್ಧ ಗಾಳಿ
ನೆಲೆಗೆ ನೆಲೆ ಇಲ್ಲದಿರೆ ಇನ್ನು ನಮಗೆಲ್ಲಿ ನೆಲೆ

ಸ್ಪರ್ಧೆ ಏಕೋ ಮರುಳೆ ಮತಿಗೆಟ್ಟ ಮನಸಿಗೆ
ಹುಸಿ ಬದುಕು ನಡೆಸಿ ಕೃತಕ ನಗುವೆ ಹೊರಗೆ
ಯಾರ ಮೆಚ್ಚಿಸಲು ಈ ಪರಿಯ ಆವೇಶ, ವೇಷ
ಖಾಲಿ ಕೊಡಕೆ ಕಾವು ಕೊಡುವುದೇನು ವಿಶೇಷ

ನೋಟವೆಲ್ಲಾ ಮನೆ ಒಳಗೆ ಮನೆಯ ಮಂದಿಗೆ
ಒಡನಾಟ, ಆ ಆಟ, ಈ ಮಾಟ ಸಹ ಸ್ವಹಿತಕೆ
ಸಹಜವಾದರೂ ಸರಿದಾರಿಯ ಸ್ನೇಹದ ಬಯಕೆ
ಕೈಗೊಂಡ ಕಾರ್ಯದಿಂದ ಪ್ರತಿಕೂಲ ಪ್ರತಿಫಲಕೆ

ಬೆಟ್ಟ ಹೊತ್ತಂತೆ ಮುಖ ಬಾಡಿಹುದು ಗೆಳೆಯ
ಬೇಕಿತ್ತೇ ನಮಗಿದು ನಾವೇ ತಂದ ಪ್ರಳಯ
ಕೃತಕ ಬೆಳಕಿನ ಸರಸ ಸರಿಯಲ್ಲ ಜೀವಭಯ
ಇರುವುದೂಂದೇ ಈಗ ನಮಗಿರುವ ಉಪಾಯ

ಇಂದಿಟ್ಟ ಬೀಜ ನಾಳೆ ಸಸಿಯಾಗಿ, ಗಿಡವಾಗಿ ,
ಮರವಾಗಿ, ಹೆಮ್ಮರವಾಗಿ, ಹಸಿರು ನೀಡುತ
ನೆರಳಾಗಿ, ಹೂವಾಗಿ, ಕಾಯಾಗಿ, ಹಣ್ಣಾಗಿ
ನಾಳೆ ಬರುವ ನಮ್ಮವರ ಬದುಕು ಹಸನಾಗಿ

ಹಣವಲ್ಲವೋ ಹೆಣವೇ ನಮ್ಮ ನಾಳೆಗೆ ನೆರವು
ಹಸಿರೇ ನಮಗೆ ಉಸಿರು ತಡ ಮಾಡಬೇಡವೋ
ಪುಟ್ಟ ಕಂದಮ್ಮನ ನಗು ಹೊಮ್ಮಲಿ ಬೆಳದಿಂಗಳು
ಚಂದದ ಹೆಸರಿಟ್ಟವರಿಗೆ ಜಗವು ಹಸಿರಾಗಿರಲು

No comments: