ಮುದ್ದು ಮಗುವೆ

ಮುದ್ದು ಮಗುವೆ ನನ್ನ ಜಗವೆ
ಸದ್ದು ಮಾಡಿ ಬಿದ್ದು ನಗುವೆ
ನಗುವ ನಲಿವ ತರವೆ ದಿನವು
ನೀನಿರುವ ಮನೆಯೆ ಸ್ವರ್ಗವು

ಎದ್ದು ಬಿದ್ದು, ಬಿದ್ದು ಎದ್ದು
ಮರಳು, ಮಣ್ಣು, ಜಲ್ಲಿಕಲ್ಲು
ಸಿಗುವ ನೀರಿನಲ್ಲಿ ನೆನೆದು
ಮೈ ಮುಖಕೆ ಬಣ್ಣದ ಓಕುಳಿ

ನಿನಗಿಲ್ಲ ಯಾವ ಬದ್ಧತೆ
ಇರುವುದೊಂದೇ ಮುಗ್ಧತೆ
ಮುಂಜಾಗ್ರತೆ ನಿನ್ನ ಕೊರತೆ
ಇದೇ ನನಗೆ ಬಿಡದ ಚಿಂತೆ

ನೇರ ಮುಖಾಮುಖಿಯೊಂದಿಗೆ
ಮುಖವಾಡ ಕಳಚಿಬಿತ್ತು ಮಂದಿಗೆ
ನೀನು ಸದಾ ನಗುವ ಕಾರಂಜಿ
ಈ ಬಾಳ ಅಪೂರ್ವ ಅಪರಂಜಿ

ಮುಗ್ಗರಿಸದಿರು ಮುದ್ದು ಮಗುವೆ
ನಿನ್ನ ನೋವು ಸಹಿಸಲು ಅಸಾಧ್ಯ
ನಿನಗೆ ತಿಳಿಹೇಳಲು ಕಷ್ಟಸಾಧ್ಯ
ಈ ಅಸಹಾಯಕತೆ ನನ್ನ ವ್ಯಥೆ