ಗೊಂದಲದ ಗೂಡಿನೊಳಗೆ

ದಟ್ಟ ಕಾಡಿನ ಮಧ್ಯೆ ಎತ್ತರದ ಮರದಲ್ಲಿ
ಗೊಂದಲದ ಗೂಡಿನೊಳಗೆ ನಿದ್ರಿಸುವ
ನಟನೆಯಲಿ ಹಗಲುಗನಸು ಕಾಣುತ್ತಿರೆ
ಸುತ್ತಲಿನ ಹಸಿರು ಹೊರ ಜಗಕೆ ಹಣತೆ

ನಿಟ್ಟುಸಿರನಿಟ್ಟು ಮತ್ತದೇ ಸಾಗರದಲಿ
ದಿಕ್ಕೆಟ್ಟ ಹಕ್ಕಿಯಂತೆ ದುಗುಡದಿಂದಿರೆ
ಚಟ ಪಟನೆ ರೆಕ್ಕೆ ಹೊಡೆದು ಮೋಹಕ
ಮೊಗದವಳು ಪಟ ಪಟನೆ ಹಾರುತಲಿ

ರೆಂಬೆ ಕೊಂಬೆಗಳಲಿ ನಿಂತು ನಿಲ್ಲದೆ
ಹಾಗೆ ನಗುವ ಕಾರಂಜಿ ಹೊಮ್ಮಿಸಿತ್ತು
ಕ್ಷಣದಲೇ ಮರೆತೆ ನೋಡುತ ಬೆರಗಾದೆ
ನಿತ್ಯ ಸೌಂದರ್ಯವತಿ ರೋಮಾಂಚನ

ಅಂಬೆಗಾಲಿಡುತ ತೊದಲ ಮಾತಿನಲಿ
ಮೆಲ್ಲ ಮೆಲ್ಲಗೆ ಹಾಗೆ ಹತ್ತಿರ ಹೋಗಲು
ಎದೆಯ ಏರಿಳಿತದ ವೇಗ ಕೇಳಿಸಿತ್ತು
ಮೈ ಬೆವರಿದರು ಸಹಜತೆ ಬಯಸಿತ್ತು

ದಟ್ಟ ಕಾಡಲ್ಲಿ ಗೊಂದಲದ ಗೂಡಿನಲಿ
ಕಳೆದು ಹೋಗುವ ಭಯ ಕಾಡುತ್ತಿತ್ತು
ಎದುರಾದ ಅಡತಡೆಗಳ ದಾಟದಲೆ
ನೂರೆಂಟು ನೆವಗಳನು ಹುಡುಕುತ್ತಿತ್ತು

ಎದುರಿದ್ದ ಚಂಚಲೆ ಮಿಂಚಂತೆ ಬಂದಳೆ
ಕಳೆದುಕೊಂಡರೆ ಮತ್ತೆ ನೆನಪಾಗುವಳೆ
ದಿಕ್ಕೆಟ್ಟ ಬದುಕಿಗೆ ಬೆಳಕಾಗಿ ಬಂದವಳು
ಆಗಲೇ ಸ್ಪಷ್ಟ ಗುರಿಯೊಂದ ಮುಂದಿಟ್ಟಳೆ