ಮಾತು ಮೌನ*

ಮೊದಮೊದಲು ಮಾತು ಮೌನ
ಕ್ಷಣ ಕ್ಷಣವು ಕುತೂಹಲದ ಕದನ
ಹಂಬಲಿಸುತಿರುವೆ ಯಾವುದಕ್ಕೆ.
ಮನವ ಮೌನವಾಗಿಸಲಾಗದೆ?

ತಳಮಳಗಳ ತಡವರಿಕೆಯ ಬೇಗೆ
ಏನನೋ ಕಾಣುವ ಕಾತುರ ಕಣ್ಣಿಗೆ
ಕದಡಿದ ಹನಿ ಗೆರೆಯಂಚಿಗೆ ನೂಕಿ
ಮೊಗದಲ್ಲಿ ತನ್ನ ಹಾದಿ ಹುಡುಕಿತ್ತು

ಕಂಡ ಪ್ರತಿಬಿಂಬ ಅದೇ ಹೇಳಿರಲು
ದಿಟವನೇಕೊ ಒಪ್ಪದೀ ಮನಸು
ತುಟಿತೆರೆದು ತಡುಕಿದರು ಸಿಗದ
ಮಾತು, ಮೌನವೇ ಹಿತವೆನಿಸಿತು.

ಸದ್ದಿಲ್ಲದ ನಡೆನುಡಿಯ ಮರೆತಂತೆ
ಬಂದ ಕರೆಗಳೆಲ್ಲವ ಆಲಿಸುವ ಬಯಕೆ
ತನ್ನದಲ್ಲವೆಂಬ ಭಯ ಕಾಡಿದ್ದು ಸಹಜ
ಪರಿಚಯವಿರದ ಎಚ್ಚರಿಕೆಯ ಜೊತೆಗೆ.

ಹೊಸತು ಹಳೆತಾಗುವುದು ಖಚಿತ
ಯೌವನದ ಕಾಲ ಕರಗುವುದು ನಿಶ್ಚಿತ
ಬೆರಗಾಗುವ ವಿಷಯವಿದಲ್ಲ ಅಪರಿಚಿತ
ನಿಟ್ಟುಸಿರಿಡಲೂ ಸಹ ಕಾಯಬೇಕು.